ठाणे : स्तनपानाचे महत्त्व सांगणारे पोस्टर्स, घोषवाक्य स्पर्धा, कार्यशाळा आणि चर्चासत्र आणि स्तनपानाचे महत्त्व सांगणाऱ्या विविध कार्यक्रमांचे आयोजन करून महापालिकेचे छत्रपती शिवाजी महाराज रुग्णालय आणि राजीव गांधी वैद्यकीय महाविद्यालयात जागतिक स्तनपान सप्ताह साजरा करण्यात आला.
स्तनपान सप्ताह सांगता कार्यक्रमासाठी महापौर मीनाक्षी राजेंद्र शिंदे, विरोधी पक्षनेते मिलिंद पाटील, नगरसेविका अपर्णा साळवी, वैद्यकीय आरोग्य अधिकारी डॉ. राम केंद्रे, अधिष्ठाता डॉ. संध्या खडसे, बालरोग विभागाच्या प्रमुख डॉ. वंदना कुमावत इत्यादी मान्यवर उपस्थित होते.
स्तनदा मातांना स्तनपान करण्यास प्रवृत्त करणे, कुटुंबातील सदस्यांनी मातांना स्तनपानासाठी वेळ उपलब्ध करून देणे, इतर कामातून मुक्त ठेवणे, स्तनपान करण्यासाठी जागा उपलब्ध करून देणे, तसेच स्तनदा मातांना कुटुंबातील वेगवेगळ्या जबाबदाऱ्या सांभाळताना साह्य करणे गरजेचे आहे, अशी मते मान्यवरांनी आपल्या भाषणात व्यक्त केली.
या कार्यक्रमाला छत्रपती शिवाजी महाराज रुग्णालय, राजीव गांधी वैद्यकीय महाविद्यालय, श्रीमती मीनाताई ठाकरे परिचर्या प्रशिक्षण संस्थेचे विद्यार्थी, कर्मचारी आणि डॉक्टर्स मोठ्या संख्येने उपस्थित होते.